XUGANDO COL PASÁU Y REFLEXIONANDO SOBRE’L PRESENTE

Nestos díes de Navidá tola xente mira p’atrás y recuerda con señaldá la ilusión cola qu’esperaben de neños la llegada de los Reis Magos. Cuando RomanArmy.eu cumple un añu de vida, los xuguetes llévennos a una reflexión que queremos compartir con toos y toes.

A lo llargo del mes de xuno del añu pasáu, el centru comercial Intu Asturias, asitiáu cerca d’Uvieo (Asturies), acoyó la exposición Asturias, nuestra historia en miniatura, organizada por AESClick. Nella recreábase con figures de la marca conocida Playmobil varios episodios del pasáu asturianu.

Ente toos ellos hubo un diorama que nos llamó especialmente l’atención: “Las legiones en tierra astur”. Esti representaba una escena complexa –d’unos 200 personaxes– onde sobresalía una fortificación romana de planta cuadrangular delimitada por una empalizada de madera. L’acción completábase con una galera romana y una calzada empedrada en fase de construcción.

Parte del diorama “Las legiones en tierra astur”. Nel medio de la imaxe los castra lexonarios y nel primer planu’l campamentu extramuros de comerciantes y prostitutes que solíen acompañar estos establecimientos.

Al llau d’esti diorama había un panel explicativu qu’intentaba resaltar, de forma cenciella y amena, la importancia que tuvo l’exércitu romanu na conquista y dominación de l’Asturies actual. Ye oportuno manifestar la transcendencia que-yos da tamién a estes tropes non solo como fuerza de combate, sinon tamién como elementos fundamentales pa echar a andar el comerciu, les infraestructures y el redeseñu del texíu económicu d’estos territorios que yá tán dominaos por Roma.

Imaxe del panel explicativu (delantre y detrás) onde fala de la presencia de les lexones n’Asturies (© Textu: AESClick).

Sicasí, nel textu del panel explicativu destaca l’ausencia total de referencies a los campamentos romanos de marcha (castra aestiva) alcontraos n’Asturies. A lo llargo d’esta década última descubriéronse cerca d’una veintena d’estos asentamientos de carácter temporal. Esto supunxo un cambiu radical nel panorama investigador que revelen estos cuatro obxectivos:

  • La oportunidá de conocer arqueolóxicamente un bon númberu de sitios vinculaos a la presencia militar romana n’Asturies.
  • La posibilidá d’establecer por ver primera igual les lliñes d’avance que los movimientos de les tropes romanes pa esti teatru d’operaciones del Bellum Asturum.
  • La recuperación d’una colección importante d’armamentu y equipu militar relacionaos col conflictu.
  • El desenvolvimientu de métodos de trabayu nuevos pa la identificación y estudiu tanto d’estos sitios arqueolóxicos como de les campañes militares nel so conxuntu.

Hai que preguntase por qué estos campamentos de marcha, que son la evidencia material más precisa d’esta presencia militar, queden fuera del discursu históricu usáu pola sociedá actual. Anque esta ausencia puede explicase por factores múltiples, cremos que se tienen que resaltar dos: la puesta en valor d’esti tipo de sitios ye insuficiente y desigual; la literatura científica llega mal a la ciudadanía.

Los propios investigadores que trabayamos nesti campu tenemos qu’asumir que se ta faciendo algo mal cuando nun somos quien a transmitir a la población el trabayu que se fai diariamente. Igual ye porque los discursos son mui técnicos, con un rexistru lingüísticu excesivamente complexu; puede que les canales d’información nun sean apropiaes. Lo cierto ye que si echamos un güeyu a la nuestra contorna arqueolóxica vese un desequilibriu notable ente los esfuerzos que se faen pa difundir los avances d’estes investigaciones dientro del mundu académicu y l’interés por divulgar los descubrimientos nuevos ente les comunidaes locales o el gran públicu.

Iniciatives como la de la exposición señalada son experiencies interesantes porque sirven pa interconectar el mundu académicu col públicu xeneral. Ye claro qu’unos conteníos amenos –pero rigorosos– presentaos nun formatu atractivu siempre van consiguir llegar más a la sociedá qu’una monografía científica. De la mesma manera, estes actividaes constitúin una ocasión excelente pa reflexionar sobre la forma en que se transmite’l conocimientu, cuálos son los puntos fuertes del nuestru trabayu y los aspectos onde se tien que meyorar.

Na colección “Playmobil. La aventura de la Historia” preséntase de manera didáctica una recreación d’un campamentu de marcha lexonariu onde se señalen los elementos principales que lu compuenen. Así, la cárcava, el parapetu de tierra y les puertes con clavícula coinciden colos restos de les fortificaciones documentaes nel nuestru trabayu (© PLANETA DᵉAGOSTINI).

Romanarmy.eu nació con una vocación doble: facer partícipe a la comunidá de los descubrimientos alredor de la conquista romana del NW y contribuir a la construcción d’una lectura nueva d’estos episodios históricos, a la vez que se refuguen los paradigmas historiográficos vieyos y s’establecen lliñes interpretatives nueves. Por too ello, cremos que’l nuestru esfuerzu nel ámbito de la difusión y divulgación cobra más sentíu al ver de manera clara qu’esti tipo de problemas siguen perpetuándose y reproduciéndose.

Leave a Comment

Your email address will not be published. Required fields are marked *

*