La nuestra investigación amuestra una concentración de campamentos militares nel occidente asturianu siguiendo los mesmos patrones d’emplazamientu vistos nos escenarios localizaos en Cantabria o nel centru d’Asturies. Anque la bibliografía y les fontes históriques son mui probes a la hora de falar d’escenarios bélicos específicos nesta zona, les evidencies arqueolóxiques quieren indicar la existencia d’una vía de penetración que pudiera vinculase a les Guerres Cántabres y la postguerra posterior.

La manera más cómoda d’avanzar pel territoriu asturianu ye per delles sierres llargues y con cimes poco destacaes. Ye’l casu de la sierra que s’extiende dende l’interior de la provincia de Lugo hasta la ría d’El Navia. Estes condiciones aprovechóles l’exércitu romanu pa transitar peles sos cimes, como prueben los tres castra aestiua documentaos que pudieron formar parte d’una liña d’avance del exércitu durante les Guerres Astur-cántabres.

El Chao de Carrubeiro (Bual, Asturies) llevántase sobre un llanu a 917 metros d’altura. Tien una planta con forma de naipe alterada namás por dos retranqueos destinaos a salvar una vaguada pequeña y ciarra 5,5 ha. Les defenses, compuestes por un sucu de tierra potente, conserven tres accesos con clauicula.

A Pedra Dereta (Bual, Asturies) asítiase sobre una llanada grande elevada sobre’l conxuntu de la sierra. Tien un aplanta menos regular qu’El Chao de Carrubeiro y pior conservada pola actividá ganadera intensa de la zona. Les liñes rectes y esquines curves conformen el perímetru en tres de los sos llaos, mientres que nel Leste parez que se desenvolvió una prolongación p’acceder a una fonte.

El Pico el Outeiro (Taramunde / Vilanova d’Ozcos, Asturies) foi afectáu pola erosión del terrén y la explotación forestal del sitiu. Entre los elementos documentaos cuéntense dos de los cuatro llaos que tenía, compuestos por un sucu de tierra y uníos por una esquina curva. Nel interior atópase otru recintu menor, posiblemente un castellum d’unos 2.000 m².

A los tres campamentos súmase una liña en Cildadeya (Vilanova d’Ozcos, Asturies) que corta’l tránsitu de la sierra entre A Pedra Dereta y El Pico el Outeiro. Trátase d’un sucu y cárcava qu’aprovecha un pasu estrechu entre una zona peñascosa y un regueru natural pa ciarrar el camín. A falta de materiales diagnósticos desconocemos la so cronoloxía.