Dende finales del sieglu pasáu l’arqueoloxía militar romana n’España vivió una verdadera revolución. El desenvolvimientu de l’arqueoloxía urbana o’l perfeccionamientu de les técniques prospectives son dalgunos de los avances que cambiaron pa siempre la disciplina nes décades de 1990 y 2000. Agora, l’interés creciente pola fotografía aérea y satelital abrióla a los aportes d’un númberu mayor de persones, de manera que se superaron los corsés académicos y especializaos tradicionales.

D’esti mou, si en 1990 se conocíen namás 11 xacimientos militares romanos d’época altoimperial nes rexones del norte de la Península Ibérica, agora podemos falar d’unos 100. Un númberu importante d’estos descubrimientos recientes fueron detectaos y estudiaos mediante l’emplegu de técniques de detección remota, esto ye, fotografía aérea histórica y moderna, imáxenes de satélite, LiDAR aéreo, fotogrametría… La combinación de toes eses ferramientes cola prospección arqueolóxica de superficie y los SIX (Sistemas d’Información Xeográfica) permitiónos desenvolver nos años últimos metodoloxíes nueves de coste baxo, efectives especialmente al estudiase esta clas d’estructures arqueolóxiques en casique cualquier tipu de terrén. El nuestru obxectivu principal agora ye consolidar esta lliña d’investigación, explorar les sos potencialidaes, intentar reforzala ellí onde amuestra les sos debilidaes y entender meyor el mou nel que s’articuló la presencia militar romana nestes rexones adoptando perspectives multidimensionales.

¿Quieres entrar nesta pequeña revolución?