El xueves pasáu, día 17 de diciembre, presentóse en Xixón el llibru Las Guerras Astur-Cántabras, que recueye les actes del Primer Encuentro Arqueológico de las Guerras Ástur-Cántabras que se celebrara nesta ciudá n’ochobre del 2014. La publicación ta coordinada por Jorge Camino Mayor, Eduardo Peralta Labrador y Jesús Francisco Torres Martínez, y el trabayu editorial foi obra de KRK Ediciones. El conteníu ye’l resultáu de les intervenciones de bien d’autores que tratanon les novedaes más recientes aportaes pola arqueoloxía sobre les Guerres Asturcántabres. Nós participamos presentando trés artículos que recueyen dalgunos de los xacimientos que localizamos en Galicia, Asturies y Llión nestos años últimos.
En «La sierra de Penouta y El Cordal d’Ouroso: una línea de avance del ejército romano en el occidente cantábrico» describimos la ruta d’avance dende l’interior de Lugo hasta la conca baxa d’El Navia, añediendo a los tres campamentos conocíos la cárcava inédita de Cildadeya (Vilanova de Ozcos, Asturies). Incluimos equí tamién una reseña del campamentu de Moyapán (Ayande, Asturies).
Saltando a Llión, faise tamién una reseña breve del campamentu de Huerga de Frailes en «El castra aestiva de Huerga de Frailes (Villazala, León)», onde describimos les traces cuasimente esaparecíes de lo que foi esti asentamientu na oriella oriental de L’Órbigu.
Tirando más contra l’Oeste, «Novedades sobre la presencia del ejército romano en el occidente galaico» repasa los recintos de O Cornado (Negreira, A Coruña), Campos (Vila Nova de Cerveira, Viana do Castelo, Portugal) y el posible de Ferreira (O Valadouro, Lugo), amás d’ufiertar les primeres hipótesis sobre’l so contextu cronolóxicu y funcional.
