El campamentu de Moyapán (Ayande, Asturies) aparecía de forma casual nel 2007 mientres s’observaba la fotografía aérea d’una de les zones mineres romanes más importantes del occidente asturianu. Yera’l segundu reconocíu n’Asturies depués d’El Picu Curriel.los (L.lena/Ayer) y el qu’abrió’l nuestru camín na investigación de la presencia del exércitu romanu n’Asturies y Llión.
Los castra aestiua (campamentu temporal de marcha) de Moyapán ocupa un picu de 1.075 metros sobre’l nivel del mar, controlando’l pasu pela sierra de Carondio y dando vista a la zona minera del valle de Bustantigo. La so situación permitió una conservación mui bona de los sucos que tracen el perímetru defensivu nes cares Noroeste y Suroeste, que tienen alredor d’un metro d’altura. Pel Noreste la defensa faise con un sucu que destaca menos n’altura y pel Sueste aprovéchase la caída natural del monte, más arimada que nos otros llaos. El nuestru trabayu de prospección amuestra la presencia de dos posibles accesos con clauiculae (nos llaos Noroeste y Suroeste), un sistema de protección de les entraes mui habitual nos campamentos romanos.
Trátase d’un recintu mui pequeñu, de solo 1,5 ha de superficie, bien distante de los otros campamentos güei conocíos nel occidente asturianu, que suelen andar entre 4 y 10 ha. El so dominiu directu sobre les mines de Bustantigo fainos proponer, como hipótesis de partida, que pudo haber una relación entrambos dos elementos. Nesi sen, ye bien conocida la participación del exércitu romanu na xestión y organización de la minería. Con too, nun escartamos que pueda tener relación coles acciones de conquista de los años 26 – 22 a.C. Tristemente’l sondéu escaváu pol siguimientu arqueolóxicu de les obres d’un parque eólicu nel 2009 nun dio más datos sobre la so cronoloxía o función. La escavación foi coordinada por Luis Blanco Vázquez.
