Y depués de la conquista ¿qué?

Roma nun vino aquí pa nada. Detrás de la conquista hai unos intereses que mueven al Imperio naciente a esplegar toles sos fuercies sobre un requexu pequeñu del estremu occidental d’Europa. Ente esos obxectivos taben los xacimientos d’oro tan abondantes nel Noroeste ibéricu, especialmente ricos en zones como la tierra llionesa de Cabreira. Cola misión d’estudiar l’impacto de la conquista y les tresformaciones profundes que la siguen, el mes d’agosto pasáu los nuestros compañeros Andrés Menéndez, Valentín Álvarez y David González escavaron nel poblao fortificáu d’El Castru (La Cuesta, Llión).

L’actividá minera intensísima d’esti territoriu nos sieglos I y II d.C., con complexos productivos tan notables como los de la redolada d’El Picu Talenu, motivó unos cambeos radicales nos poblaos preexistentes y la fundación d’otros asentamientos nuevos. L’importante recintu fortificáu d’El Castru nun foi ayenu a ello, según se ve na abondanza d’escories de fierro atopaes na so contorna. Por esta razón escoyóse p’abrir un sondeo valorativu que pudiera dar pistes del so potencial arqueolóxicu, qu’amostró ser impresionante. Hastasagora, la campaña breve realizada esti verano permitió sacar a la lluz parte d’un cuartu que, en base a la gran cantidá y la tipoloxía de los materiales alcontraos, puede considerase un almacén d’época romana.
La intervención financiáronla l’Ayuntamientu de Trueitas, la Xunta Vecinal de La Cuesta y l’Instituto Leonés de Cultura de la Diputación de León. Actualmente los materiales tán en proceso d’estudio y ta considerándose la preparación de campañes nueves a la vista de los resultaos tan excelentes consiguíos.

Como complementu a la escavación realizóse una prospección del territoriu que facilitara la contextualización del poblao. Esto permitiónos documentar y inventariar pa la so protección un nuevu campamento militar temporal romanu nel valle d’El Ríu Eria.

Leave a Comment

Your email address will not be published. Required fields are marked *

*