Xunto al artículu del nuestru compañeru José M. Costa, el númberu últimu de la Revista Arkeogazte contién un trabayu firmáu por miembros del nuestru equipu onde presentamos un estudiu preliminar d’un campamentu romanu o castra aestiua identificáu va poco nel sitiu d’A Serra da Casiña (Valboa, Llión).
Nesti artículu descríbense les evidencies constructives y el contextu espacial del campamentu asitiáu na redolada del llugar de Valverde. El recintu fortificáu, d’entre 11 y 12 hectárees d’extensión, sería ocupáu temporalmente por dalgún continxente militar romanu nun momentu que tovía nun podemos determinar. Sicasí, podríemos relacionalu col períodu de conquista y pacificación d’esta zona de montaña berciana hacía’l cambéu d’era. Como n’otros casos, la so detección foi posible gracies a la utilización de técniques de teledetección como l’análisis de fotografíes aérees y satelitales, amás del uso de la tecnoloxía LiDAR, que ta llamada a revolucionar l’arqueoloxía de zones de montaña y con vexetación densa como les sierres del Noroeste ibéricu.
El momentu precisu d’ocupación del campamentu d’A Serra da Casiña nun pudo ser definíu tovía, en cuantes que l’equipu nun tuvo la financiación necesaria pa realizar prospecciones o escavaciones arqueolóxiques nel terrenu que puedan responder estes cuestiones. Por embargu, la localización d’esti campamentu refuerza’l protagonismu del espaciu montascosu que separa les provincies actuales de Llión y Lugo durante’l tiempu de conquista y dominación romana d’esti territoriu. Ábrese, per otru llau, el debate sobre la extensión pa escontra l’occidente del teatru d’operaciones de les Guerres Astur-Cántabres (29-19 a.C.).
El recintu d’A Serra da Casiña ye un fitu nuevu pa les investigaciones arqueolóxiques de la provincia de Llión que s’inxerta nuna serie de campamentos romanos de campaña –enclaves como los de Güergaflaires (Villazala) o A Granda das Xarras (Ancares/Ibias)– que miedra constantemente. Esto ye posible gracies al llabor paciente de bien d’arqueólogos que tán inmersos nel estudiu de la conquista y romanización de los territorios noroccidentales de la Península Ibérica.
Podéis descargar l’artículu equí.