Nel númberu últimu de la revista Nailos, editada pola Asociación de Profesionales Independientes de la Arqueología de Asturias (APIAA), publicóse estos díes un artículo del nuestru compañeru José Costa sobre los campamentos de Castrucarbón (Llión).
Al principiu de los años sesenta del sieglu pasáu, mientres intentaba definir el trazáu de la vía XVII del Itinerariu d’Antonino (Bracara Augusta–Asturica Augusta), E. Loewinsohn detectó na fotografía aérea de 1956-57 hasta trés recintos campamentales y una estructura circular llamativa. Esti descubrimientu notable llamaría l’atención d’otros investigadores que, varies décades depués, sobrevolaríen el sitiu consiguiendo identificar un recintu nuevu. Por tanto, nel sitiu conocíu como La Chana nun se documentó namás la primera agrupación de campamentos temporales, sinón que foi tamién ún de los primeros sitios onde la fotografía aérea demostró ser un recursu importante pa la arqueoloxía militar romana.
El xacemientu de La Chana na actualidá.
L’accesu llibre al importante catálogu fotográficu del Instituto Geográfico Nacional (IGN) permítenos revisitar agora esti sitiu arqueolóxicu y contrastar el potencial de la fotografía aérea histórica y reciente, les imáxenes de satélite y el LiDAR. Los resultaos son alentadores, porque nun ye solo que se pudo estudiar meyor les estructures, ye que tamién aparecieron otres nueves.
Amás, l’aplicación d’análisis GIS (visibilidá, mobilidá), dexa reabrir el debate sobre por qué se produció esta concentración de campamentos nesti sitiu y qué unidaes militares pudieron vese envueltes na so construcción.