Vilnius foi la ciudá escoyida pola European Association of Archaeologists (EAA) pa celebrar la so xunta añal n’anguaño 2016. Unes 1600 persones dieronse cita na capital lituana no que se consolidó yá como la cita periódica más importante pa la investigación arqueolóxica europea.
El nuesu equipu d’investigación nun podía faltar a esta ineludible cita, tando presentes los nuesos compañeros José M. Costa García (Universidade de Santiago de Compostela/VU University Amsterdam) y David González Álvarez (Institutu de Ciencies del Patrimoniu/Durham University). En representación de too el nuesu equipu presentaron una comunicación na sesión “New Knowledge About Past Societies Through the Use of Advanced Remote Sensing Techniques”. El panel, entamáu por Ole Risbøl (Norwegian Institute for Cultural Heritage Research), Lars Gustavsen (Norwegian Institute for Cultural Heritage Research) y Hanna Stöger (Leiden University), pretendía poner en consuntu les potencialidaes de los métodos de teledetección na investigación arqueolóxica de distintes cronoloxíes y rexones europees. Coles mires de espublizar el nuesu proyectu y aldericar les resultancies del nuesu trabayu con investigadores de toa Europa, participamos nesti panel cola presentación “Airborne LiDAR data for the study of Roman military presence in NW Iberia”.
Como yá comentemos n’otres ocasiones, los establecimientos temporales del exércitu romanu son enclaves caracterizaos por estructures fráxiles que’l pasu del tiempu borra con facilidá. Amás, la so ocupación episódica fai que sían pocos los materiales arqueolóxicos que puedan revelar la so ocupación. Por ello, estos xacimientos son prácticamente invisibles sobre’l tarrén; o siquier ser hasta la estensión de les técniques de teledetección na investigación arqueolóxica. Estes ferramientes –como l’estudiu de fotografíes aérees– fueron fundamentales pa llanzar l’Arqueoloxía militar romana na península ibérica na última década del sieglu XX. Pero nos últimos años, nuevos recursos tán al nuesu algame p’afondar nel estudiu de la presencia militar romana nel noroeste ibéricu. Sobre estes ferramientes –ente les que destaca l’empléu de los datos LiDAR– trató la nuesa comunicación nel encuentru de la EAA, esaminando les llindes y les potencialidaes de los métodos emplegaos pol nuesu grupu d’investigación. Sobre esta base, la próxima xera a la qu’enfrentamos ye’l desenvolvimientu de modelos predictivos que sirvan p’alcontrar nuevos campamentos romanos, y la profundización de les nueses investigaciones escontra l’estudiu contextual d’estos enclaves.
Queda trabayu asgaya per delantre, y de Vilnius tornamos con bones idees y nueves entrugues. Confiamos en que nos acompañes nesti viaxe, nel que llueu vamos poder dir encaxando nueves pieces.