- RomanArmy naceu en 2016 como un colectivo de investigadores interesados na Arqueoloxía do conflito e no estudo do proceso de conquista do NW ibérico por parte de Roma. Nesta liña, pretende sumar competencias, coñecementos e sinerxías para explorar novas vías de investigación baseadas na experimentación e na innovación, pero tamén no rigor científico e na calidade da investigación.
- RomanArmy non se constitúe como un grupo de investigación formal dentro dunha estrutura universitaria ou dun centro de investigación en particular, independentemente de que algún dos investigadores que o integran podan desenvolver a súa actividade nestes ámbitos. Deste modo, o colectivo non pretende acudir a fontes de financiamento convencionais deste tipo de grupos (plans autonómicos, ministeriais ou europeos de I+D+i), sendo por iso autónomo, auto-sostido e soportado polo esforzo e dedicación dos seus membros. Unicamente poderá establecer alianzas e colaboracións puntuais con estes centros para acción concretas, pero sempre dende unha relación de horizontalidade e de respecto cara os principios que rexen RomanArmy.
- RomanArmy funciona de maneira descentralizada, con actuacións propostas polos propios membros, aprobadas por consenso e ás que o resto de investigadores do colectivo incorpórase voluntariamente se así o considera oportuno.
- RomaAmy céntrase non só na produción do coñecemento, senón que aposta pola socialización da investigación. Deste modo, abre canles de comunicación directa tanto con outros colegas do ámbito científico e académico, así como co público final, procurando incorporalo ao propio proceso de xeración de coñecemento. Por iso, RomaArmy explora novas vías para a difusión dos resultados máis aló dos formatos estándares da publicación académica.
- RomanArmy comparte unha visión da ciencia democrática, dinámica, aberta, feminista e na idea de que esta debe contribuír a mellorar a sociedade creando unha cidadanía máis crítica e informada. Neste senso, RomanArmy constitúese como unha plataforma de acción científica que, a pesar do limitado do seu alcance e posibilidades como colectivo, desborda moitas das problemáticas burocráticas, administrativas e de xestión que nestes momentos afogan a unha boa parte das institucións académicas e científicas.
- O día a día de RomanArmy baséase nun debate aberto e proposto en termos de liberdade, igualdade, horizontalidade e democracia entre os seus membros, así como entre estes e a sociedade en xeral. Tal debate fundaméntase no intercambio de ideas, a busca de consensos e o aprendizaxe colectivo, o cal reforza a súa vez o compromiso de honestidade e transparencia do grupo. Permítenos escoitar, dubidar, opinar, concienciar e aprender na liberdade e na multivocalidade.
- RomanArmy aposta claramente polo respecto á diversidade de pensamento, que ven fundamentado polo carácter interdisciplinar, heteroxéneo e incluso frecuentemente heterodoxo do grupo, conformado por investigadores procedentes de diferentes disciplinas, tradicións investigadoras, áreas xeográficas e con distintos intereses. Tal bagaxe vital non determina o establecemento de rangos e xerarquías, senón que se atopa ao servizo do ben común e do pensamento plural.
- RomanArmy é un colectivo nativo dixital que se empapa do carácter inmediato e interactivo que emana deste concepto. O que nos permite abrir diálogos francos coa cidadanía, seguindo os principios da ciencia pública e en aberto. Apostamos por unha visión máis aberta da propiedade intelectual como un ben público e adoptamos unha ética hacker na nosa relación coa tecnoloxía: reinterpretándoa, reinventándoa e explorando novos usos tanto para a investigación como para a comunicación do proceso científico.
- RomanArmy enténdese como un colectivo transdisciplinar, en permanente construción e polo tanto cambiante, pero sempre baseado nuns principios éticos e de compromiso social ben definidos aos que atende este decálogo.
- RomanArmy naceu nas marxes da Academia, como unha anomalía no sistema. Con utópica irreverencia constitúese como modelo meta-académico. Bebe dun Latente activismo envolto en desenfado. RomanArmy autodefínese como colectivo de investigación con arquitectura de WhatsApp.