Campos ta cerca de São Pedro da Torre (Valença, Portugal), na oriella del ríu Miño. Equí, los gallegos construyeron una fortificación de tierra con planta estrellada, el fuerte de San Luís Gonzaga, na Guerra da Restauração Portuguesa (1640-1668). Como estratexa pa parar l’avance d’estes tropes en tierres portugueses, les cróniques cunten que, a la mesma distancia a tiru de cañón d’esti fuerte, los lusos construyeron una serie de talayes y fortinos, de los que polo menos ún taría nel sitiu de Campos.
Cuando s’intentó comprobar nel sitiu la pervivencia de restos arqueolóxicos relacionaos con esti episodiu históricu, la zona yá taba afarada pola construcción d’un polígonu industrial na década de 1980. Ye por ello que se recurrió al análisis de les imáxenes satelitales de Google Earth y de les fotografíes aérees históriques qu’existen pa esta zona de Portugal (Vuelos RAF 1947, SPLAL 1949 y USAF 1958). Entós identificóse una estructura de dimensiones grandes y planta cuadrangular coles esquines arredondiaes. Amás d’eso, dientro d’ella atopáronse los restos d’otra estructura que sí podía ser una fortificación d’época moderna.
Depués de facer un estudiu morfolóxicu del recintu mayor concluimos que se trataba d’unos castra aestiua o hiberna reocupaos durante la Guerra da Restauração. Gracies al uso de técnicas fotogramétricas pudo vese la existencia nel interior d’un espaciu grande allanáu, una elevación artificial correspondiente a los restos del agger ac uallum campamental y una fondigonada que ta relacionada con una fossa única. Amás, les condiciones del sitiu son les ideales pa la instalación d’un asentamientu militar: un terrenu un poco pindiu, saneáu, con una visibilidá bona de la contorna y protexíu pol ríu Miño y A Ribeira de Campos. Anque nun se conoz el tamañu total del recintu, ye claro que se trataba d’un exemplar de dimensiones notables que podría guardar un destacamentu militar importante.
L’afayu de Campos implica la documentación de los primeros castra aestiua identificaos positivamente nel Norte de Portugal. Ye amás el segundu recintu militar romanu rexistráu na área occidental de la Gallaecia antigua, detrás d’O Cornado (A Coruña). Ello permite recuperar preguntes históriques vieyes sobre la magnitú y fin de la presencia militar romana na rexón que tienen que ver col procesu d’integración d’ésta nel mundu romanu.
Sicasí, ye posible que quede tovía una parte pequeña intacta en Campos. El so estudiu coles técniques adecuaes dexaría afondar nel conocimientu y datación de los castra aestiua. Namás falta alcontrar la guya nel polígonu.