Campos emprázase no entorno de São Pedro da Torre (Valença, Portugal), á beira do río Miño. Aquí, os galegos construíron unha fortificación terreira de planta estrelada, o forte de San Luís Gonzaga, durante a Guerra da Restauração Portuguesa (1640-1668). Como estratexia para cortar o avance destas tropas en terras portuguesas, narran as crónicas que, equidistante a tiro de canón deste forte, os lusos construíron unha serie de atalaias e fortíns, dos cales polo menos un deles situaríase no lugar de Campos.
Cando se intentou comprobar en campo a conservación de restos arqueolóxicos que se puideran relacionar con este episodio histórico, a zona xa estaba arrasada pola construción dun polígono industrial na década de 1980. É por iso que houbo de recorrer á análise das imaxes por satélite de Google Earth e das fotografías aéreas históricas existentes para esta zona de Portugal (Vóos RAF 1947, SPLAL 1949 y USAF 1958). Foi entón cando se identificou unha estrutura de grandes dimensións e planta cuadrangular cos esquinais redondeados. No seu interior acháronse ademais os restos doutra estrutura que si podía corresponderse cunha fortificación de época moderna.
Logo de levarse a cabo un estudo morfolóxico do recinto maior concluímos que se trataba dun campamento romano reocupado durante a Guerra da Restauração. Mediante o emprego de técnicas fotogramétricas puidemos apreciar a existencia dun amplo espazo chairo no interior, dunha elevación artificial correspondente aos restos do terraplén campamental e dunha depresión que se relacionou cunha único foxo. Ademais, as condicións do lugar son as idóneas para o establecemento dun asentamento militar: un terreo cunha suave pendente, saneado, con boa visibilidade sobre o entorno e franqueado polo río Miño e o Ribeira de Campos. Pese a non coñecerse a extensión total do recinto, non cabía dúbida de que se trataba dun exemplar de notables dimensións que podería albergar un destacamento militar importante.
O descubrimento de Campos implica a documentación dos primeiros castra aestiua positivamente identificados na área norte de Portugal. Ademais, constitúe o segundo recinto militar romano rexistrado na área occidental da antiga Gallaecia, tras O Cornado (A Coruña). Este feito permite reverdecer vellas interrogantes históricas respecto ao alcance e finalidade da presenza militar romana na rexión en relación co proceso de integración da mesma no mundo romano.
Malia os estragos producidos pola man do home, aínda existe en Campos a posibilidade de que se conserve unha pequena zona intacta. O seu estudo coas técnicas arqueolóxicas axeitadas permitiría profundar no coñecemento e datación dos castra aestiua. So falta atopar esta pequena agulla no polígono.