Nestos díes los nuestros colegas Rebeca Blanco-Rotea, José Costa, João Fonte y Manuel Gago recibieron bones noticies. El so trabayu “A Modern Age redoubt in a possible Roman camp. The relationship between two defensive models in Campos (Vila Nova de Cerveira, Minho Valley, Portugal)” –Un reductu de la Edá Moderna dientro d’un posible campamentu romanu. La relación ente dos modelos defensivos en Campos (Vila Nova de Cerveira, Portugal)– foi publicáu como parte del númberu últimu de la prestixosa revista Journal of Archaeological Science: Reports (JAS-REP).

Como probablemente vais recordar, yá falamos equí d’esti sitiu arqueolóxicu tan interesante. Cuando la Guerra de Restauração portuguesa (1640–1668), costruyéronse una serie de fortificaciones a lo llargo de la frontera hispano-portuguesa. L’estudiu arqueolóxicu d’esos sitios combinó disciplines distintes (arqueoloxía del paisaxe, arqueoloxía de l’arquitectura, tecnoloxíes xeoespaciales y estudios documentales) col enfotu de rexistrar un paisaxe fortificáu antiguu. Esti proxectu reveló la existencia d’un conxuntu de fortificaciones pequeñes alredor de la Fortaleza de San Luís Gonzaga (Valença, Portugal), munches d’elles desaparecieron cola firma del Tratáu de Lisboa nel 1668. Na área de Campos (Vila Nova de Cerveira, Portugal), documentóse una probable fortificación de la Edá Moderna por medio del análisis de la fotografía aérea, porque un polígonu industrial destruyera’l sitiu hai pocu tiempu. Amás, nel so interior atopóse una estructura mayor, de planta cuadrangular, que foi identificada como un posible campamentu romanu.

Xunto con Alberto Gonçalves (Universidade de Porto), los nuestros colegas analicen nesti artículu dambes fortificaciones, el procesu metodolóxicu desenvueltu pa la so identificación y estudiu, la so posible interpretación histórica y cómo dambos s’interrelacionen. Animámosvos a lleer esti trabayu (que ye accesible n’abierto hasta’l mes d’avientu próximu) y afayar, a lo llargo del so textu y imáxenes, un cachu interesante de la historia compartida por portugueses y gallegos.