portada5
Les guerres cantabro-ástures son ún de los conflictos qu’espertaron más atención na historiografía española dende los sos inicios. Nos años últimos, los enormes avances producíos nel ámbitu de l’arqueoloxía militar romana supunxeron una transformación notable de los estudios sobre la materia. Sicasí, con frecuencia los análisis fueron positivistas abondo y nun afondaron nes dimensiones sociopolítica y cultural de la guerra.

Continue Reading

Campamento de Moyapán desde o ONO (12/2008)
Campamentu de Moyapán dende l’ONO (12/2008)

El campamentu de Moyapán (Ayande, Asturies) aparecía de forma casual nel 2007 mientres s’observaba la fotografía aérea d’una de les zones mineres romanes más importantes del occidente asturianu. Yera’l segundu reconocíu n’Asturies depués d’El Picu Curriel.los (L.lena/Ayer) y el qu’abrió’l nuestru camín na investigación de la presencia del exércitu romanu n’Asturies y Llión.

Continue Reading

El xueves pasáu, día 17 de diciembre, presentóse en Xixón el llibru Las Guerras Astur-Cántabras, que recueye les actes del Primer Encuentro Arqueológico de las Guerras Ástur-Cántabras que se celebrara nesta ciudá n’ochobre del 2014. La publicación ta coordinada por Jorge Camino Mayor, Eduardo Peralta Labrador y Jesús Francisco Torres Martínez, y el trabayu editorial foi obra de KRK Ediciones. El conteníu ye’l resultáu de les intervenciones de bien d’autores que tratanon les novedaes más recientes aportaes pola arqueoloxía sobre les Guerres Asturcántabres. Nós participamos presentando trés artículos que recueyen dalgunos de los xacimientos que localizamos en Galicia, Asturies y Llión nestos años últimos.

lasguerras

Continue Reading

Esti ye’l trabayu que presentamos nel 23. Limes Congress, celebráu n’Ingolstadt (Alemaña) en setiembre del 2015. Ellí amostramos el resultáu d’una investigación desenvuelta estos años últimos alredor de la presencia militar romana nel Noroeste d’Iberia y cómo la perspectiva historiográfica sobre la materia tien cambiao gracies a técniques de teledetección como l’emplegu de la fotografía aérea y satelital, o’l revolucionariu LiDAR aéreo. Esti sitiu web presenta una visión nueva de les campañes militares romanes nel contextu de la conquista y reorganización posterior del Noroeste peninsular.

Anque l’audio del video ta n’inglés puedes cambiar l’idioma de los subtítulos a gallegu, castellanu y portugués seleccionando na ruedina d’engranaxe de la esquina inferior derecha. Al ser un video interactivu tamién puedes descargar arquivos KMZ con información gráfica adicional pa caún de los sitios arqueolóxicos de los que falamos. Has tener instaláu’l software Google Earth p’abrir y ver estos ficheros.

Nesta páxina tamién puedes ver destacaes dalgunes de les conclusiones más interesantes derivaes de la presentación pública d’estos diecisiete asentamientos militares romanos.

Una visión nueva de la presencia militar romana nel NW d’Hispania

Nesti mapa puedes ver la nuestra propuesta sobre la presencia del exércitu romanu nel NW d’Hispania en 2015. Xunto a sitios yá investigaos y publicaos previamente, añedimos diecisiete localizaciones nueves qu’amuestren una presencia más densa de los continxentes militares romanos, posibles liñes nueves d’avance n’Asturies y los primeros afayos de campamentos de marcha probables nel territoriu de la Galicia actual.

Un teatru d’operaciones nel occidente ástur durante les Guerres Cántabres

La nuestra investigación amuestra una concentración de campamentos militares nel occidente asturianu siguiendo los mesmos patrones d’emplazamientu vistos nos escenarios localizaos en Cantabria o nel centru d’Asturies. Anque la bibliografía y les fontes históriques son mui probes a la hora de falar d’escenarios bélicos específicos nesta zona, les evidencies arqueolóxiques quieren indicar la existencia d’una vía de penetración que pudiera vinculase a les Guerres Cántabres y la postguerra posterior.

Continue Reading

Una vía de penetración del exércitu romanu nel territoriu gallegu

Detectamos una vía de penetración posible de les lexones romanes nel territoriu de la Galicia actual. Esto resulta mui relevante dende’l puntu de vista historiográficu, en cuantes que los campamentos romanos escavaos hasta’l momentu en Galicia correspuéndense con fases mui posteriores al escenariu de conquista del Noroeste. Nesta vía de penetración podemos identificar cinco campamentos, cuatro d’ellos na na Galicia actual.

El primeru de los campamentos ta en Valboa, n’El Bierciu, mui cerca de Villafranca, sobre la vía tradicional d’accesu a Galicia.

Una posible base loxística romana en Sarria

Como se tien detectao yá n’otros puntos de la Península Ibérica, l’exércitu romanu podía emplegar de forma reiterada un espaciu en campañes diferientes o acoyer más d’un campamentu, si esi sitiu encaxaba nel so escenariu tácticu. A Chá de Santa Marta, entre Láncara y Sarria, constitúi un conxuntu arqueolóxicu únicu en Galicia, con polo menos tres campamentos romanos posibles no arrinque de les montañes orientales de Galicia. Ye posible qu’esti sitiu funcionara como base loxística y d’agrupación de tropes.

Los tres campamentos d’A Chá de Santa Marta na foto aérea de 1956

Afrontando’l pasu del ríu Miño

El campamentu de Monte dos Trollos (O Páramo, Lugo) ta ubicáu nuna posición mui estratéxica, nel picu d’una llomba y cerca d’un vau natural del ríu Miño. La so distancia con respecto a A Chá de Santa Marta ye d’un día de camín exactamente.

La incógnita occidental: dos campamentos nuevos sobre la Depresión Meridiana

Identificáronse dos campamentos romanos nuevos na área occidental de Galicia, en puntos mui próximos a la Depresión Meridiana, la vía de comunicación tradicional de la costa gallega en sentíu sur-norte.

El campamentu d’O Cornado (Negreira) dímoslu a conocer hai yá unos años. Ye’l campamentu más occidental del continente européu hasta’l momentu.

Un campamentu na oriella del ríu Miño

Na ribera portuguesa del Miño, a l’altura de Vila Nova da Cerveira (Portugal), identificóse’l campamentu romanu de Campos. Tien grandes dimensiones, desgraciadamente foi destruyíu pola construcción d’un polígonu industrial.

La desconexión aparente (hasta’l momentu) entre O Cornado, Campos y los otros campamentos fai más difícil el so encuadre cronolóxicu y la so función. La so datación puede dir dende momentos tardorrepublicanos hasta l’Imperiu, pero revelen una presencia mui temprana del exércitu romanu na costa occidental gallega.